Testo di L. Bovio, musica di R. Falvo.
Scetateve, guagliune 'e malavita,
Ca è 'ntussecosa assaje 'sta serenata!
Io songo 'o 'nnammurato 'e Margarita
Ch'è 'a femmena cchiù bella d' 'a 'Nfrascata.
Ll'aggio purtato 'o capo cuncertino
P' 'o sfizio 'e mme fà sentere 'e cantà.
Mm'aggio bevuto 'nu bicchiere 'e vino
Pecché stanotte 'a voglio 'ntussecà.
Scetateve, guagliune 'e malavita!
È accumparuta 'a luna a ll'intrasatto
Pe' lle dà 'o sfizio 'e mme vedè distrutto.
Pe' chello che 'sta femmena mm'ha fatto,
Vurria ch' 'a luna se vestesse 'e lutto.
Quanno se ne venette â parta mia,
Ero 'o cchiù guappo 'e vascio â Sanità.
Mo, ch'aggio perzo tutt' 'a guapparia,
Cacciatemmenne 'a dint' 'a suggità!
Scetateve, guagliune 'e malavita!
Sunate, giuvinò, vuttate 'e mmane!
Nun v'abbelite, ca stò buono 'e voce!
I' mme fido 'e cantà fino a dimane
E metto 'ncroce a chi mm'ha miso 'ncroce.
Pecché nun va cchiù a tiempo 'o mandulino?
Pecché 'a chitarra nun se fa sentì?
Ma comme? Chiagne tutt' 'o cuncertino,
Addò ch'avess' 'a chiagnere sul'i'.
Chiagnono 'sti guagliune 'e malavita.
"Guapparia" è una canzone in lingua napoletana, scritta nel 1914 da Libero Bovio e musicata da Rodolfo Falvo. E' un classico brano della canzone napoletana, ed una delle più note "canzoni di giacca": Parla di un "guappo" che, per amore della sua donna, ha perso il suo onore di uomo malavitoso.
